Ер шарининг Шарқдаги илк “сурати” қандай чизилган эди? Бағдод. Милодий 830 йиллар атрофи. Қуёш тиғидан қумлар қизиган паллада, халифа Маъмун саройининг салқин хоналаридан бирида инсоният тарихидаги энг улкан илмий жасоратлардан бирига пойдевор қўйилмоқда эди. Ўз даврининг қудратли ҳукмдори олимлар олдига ақл бовар қилмас вазифани қўйди: “Менга Ернинг суратини чизиб беринглар!”. Бу шунчаки расм эмас, балки математик аниқликка асосланган, ҳар бир шаҳар, тоғ ва денгизнинг жойлашуви қатъий ҳисобланган улкан лойиҳа бўлиши керак эди. Ўша даврда, ҳали самолётлар ва сунъий йўлдошлар тугул, оддий компас ҳам кенг тарқалмаган бир замонда, бу буйруқни бажариш имконсиздек туюларди. Аммо “Байт ал-Ҳикма” – Донишмандлар уйининг олимлари бу ишни уддалашди. Улар орасида кейинчалик бутун дунё илм-фанини ўзгартириб юборган сиймо – Муҳаммад Хоразмий ҳам бор эди. Батафсил: https://uza.uz/posts/795065 Телеграм каналларимиз