Мексика пойтахти Мехико шаҳри маъмурияти 2026 йилги Жаҳон чемпионати очилишидан олдин шаҳарда норозилик намойишлари фаоллашганини қайд этди. Бу ҳақда шаҳар полицияси томонидан эълон қилинган оммавий тадбирлар бюллетенида маълум қилинди.
Жамоат хавфсизлиги вазирлигининг ҳужжатига кўра, жорий йилнинг 9 июнь куни шаҳарда бир оммавий норозилик намойиши, ўнта митинг ҳамда бошқа оммавий тадбирлар ўтказилиши режалаштирилган.
Энг йирик акция Таълим ходимларининг миллий мувофиқлаштириш қўмитаси (CNTE) томонидан ташкил этиладиган юриш бўлиб, полиция ҳисоб-китобларига кўра, унда 6 минг нафаргача киши иштирок этиши мумкин. Юриш пойтахтдаги стадион томон йўналади, у ерда 11 июнь куни Жаҳон чемпионати очилиш учрашуви ўтказилади.
Маълум қилинишича, ушбу касаба уюшмаси ўқитувчилари 2007 йилдаги пенсия ислоҳоти ва 2019 йилдаги таълим ислоҳотининг бекор қилиниши, иш ҳақларининг оширилиши ҳамда норозиликларда иштирок этган ходимларнинг маошларидан ушлаб қолишни тўхтатишни талаб қилмоқда.
Шунингдек, стадион атрофи ва шаҳарнинг бошқа ҳудудларида Айотсинападан йўқолган 43 нафар талабанинг оилалари, талабалар ташкилотлари ва жамоат бирлашмалари ҳам норозилик акцияларини ўтказишни режалаштирган.
Улар стадион реконструкциясидан кейин ўз ҳуқуқларини ҳимоя қилишни талаб қилмоқда.
Хусусан, йўқолган талабаларнинг ота-оналари шаҳар кириш нуқталарида ахборот кампанияси ўтказишни режалаштирган. Шунингдек, Автоном Метрополитен университетининг талабалар қўмитаси турнир очилиши вақтида 72 соатлик иш ташлаш ўтказиш имкониятини муҳокама қилмоқда.
Аввалроқ Мексика президенти Клаудия Шейнбаум норозиликларга қарамай, Жаҳон чемпионати очилиш маросими тинч ва зўравонликсиз ўтишини таъкидлаган эди. Унинг сўзларига кўра, ҳукуматни халқаро миқёсда намойишчиларга нисбатан босим қўлланилаётгандек кўрсатишга уринаётган гуруҳлар мавжуд, бироқ “ҳеч қандай репрессия бўлмайди”.
Маълумот учун, 2026 йилги Жаҳон чемпионатининг очилиш учрашуви бугун, 11 июнь куни Мехико шаҳридаги “Ацтека” номи билан танилган арендада бўлиб ўтади.
